"აპოელიდან" "რეალამდე"

დღეს გაიმართება ჩემპიონთა ლიგის მეოთხედფინალების წილისყრა.

24 საათი 16.03.12

"რეალი" ჩემპიონთა ლიგის მთავარი ფავორიტია

დღეს გაიმართება ჩემპიონთა ლიგის მეოთხედფინალების წილისყრა.

ევროპული საკლუბო ფეხბურთის ყველაზე პრესტიჟულ ტურნირს რვა გუნდი შემორჩა. სანამ წილისყრა ჩატარდებოდეს, გადავხედოთ ამ რვა გუნდის რეიტინგს.

8."აპოელი"

კვიპროსული კლუბისთვის 2011-12 წლების ჩემპიონთა ლიგა გასული წლის ივლისში დაიწყო. "აპოელმა" შესარჩევი ციკლი გაიარა და ისე მოხვდა ჯგუფურ ეტაპზე. მაშინ ვინმეს რომ ეთქვა, ეს გუნდი მეოთხედფინალში გავაო, ალბათ გიჟად ჩათვლიდნენ, მაგრამ "აპოელმა" ყველა პროგნოზი თავდაყირა დააყენა. ჯერ ჯგუფიდან გავიდა, მერე კი მერვედფინალში შეუძლებელი შეძლო და "ლიონის" ბარიერიც გადალახა. არადა, ამ გუნდს არც მილიარდერი მფლოებლი ჰყავს და არც ვარსკვლავებით არის დაკომპლექტებული. შეძლებს თუ არა "აპოელი" მეტის გაკეთებას? ალბათ, ვერა. წესით, კვიპროსული ზღაპარი მეოთხედფინალში მაინც უნდა დასრულდეს, მაგრამ მიმდინარე ჩემპიონთა ლიგამ და თავად "აპოელმა" უკვე იმდენი სენსაცია შემოგვთავაზეს, რომ წინასწარ ამ გუნდს გაწირვაც არ ღირს. ერთი წუთით წარმოვიდგინოთ, რომ წილისყრით "აპოელს" "ბენფიკა" ან "მარსელი" შეხვდა. მაშინ კვიპროსელებს ნახევარფინალზე ოცნების სრული უფლება ექნებათ.

7."მარსელი"

ვაღიაროთ, რომ მეოთხედფინალში "მარსელის" გასვლაც სენსაციაა. ეს გუნდი სეზონს არც ისე კარგად ატარებს. საფრანგეთის ჩემპიონატში მხოლოდ მერვე ადგილზეა. ფრანგები ვერც ჩემპიონთა ლიგის გათამაშებაში აჩვენებენ შთამბეჭდავ ფეხბურთს, თუმცა, ამ შემთხვევაში ფორტუნა "მარსელის" მხარესაა. ფრანგებს შემდეგ ეტაპზე გასვლის დიდი შანსი არ უნდა ჰონდეთ, მაგრამ თუ "მარსელს" წილისყრით გაუმართლა და, ვთქვათ, "აპოელი" ან "ბენფიკა" შეხვდა, ვინ იცის, რა მოხდება.

6."ბენფიკა"

ისევე როგორც "აპოელი" და "მარსელი", "ბენფიკაც" მეოთხედფინალის დაუპატიჟებელი სტუმარია. მართალია, პორტუგალიურმა გრანდმა "მანჩესტერი" ჯგუფში ჩატოვა, მაგრამ შთამბეჭდავი ფეხბურთი მაინც ვერ აჩვენა. დარჩენილი რვა გუნდიდან "ბენფიკა" მხოლოდ "აპოელსა" და "მარსელზე" მაღლა დგას და ნახევარფინალში გასვლის რეალური შანსიც იმ შემთხვევაში ექნება, თუ მეოთხედფინალში ამ დუეტიდან რომელიმეს დაუპირისპირდება.

5."ჩელსი"

"ნაპოლის" დამარცხებით "ჩელსიმ" გულშემატკივარს განვლილი წარუმატებლობების დავიწყების საშუალება მისცა. ლონდონურმა გუნდმა სიცილიელებთან მატჩში მართლაც საუცხოო ფეხბურთი აჩვენა და თუ მომავალშიც ასე გააგრძელა, ნებისმიერი მეტოქის დამარცხება შეუძლია, მაგრამ დარჩენილ რვა გუნდში ის ალბათ მხოლოდ მეხუთეა. ჯერ ერთი, ლონდონელთა თავკაცს, რობერტო დი მატეოს, ამ დონის თამაშების გამოცდილება თითქმის არა აქვს და, მეორეც, მხოლოდ ერთი კარგი თამაშით "ჩელსის" სიძლიერეზე ლაპარაკი ნაადრევია. "ნაპოლისთან" "არისტოკრატებმა" მართლაც სუპერფეხბურთი აჩვენეს, მაგრამ შეძლებს კი ლონდონური გრანდი იგივე გააკეთოს მეოთხედფინალში, თუ მისი მეტოქე "ბარსელონა" ან "რეალი" იქნება?!

ერთი რამ ფაქტია: მეოთხედფინალში "ჩელსი" არავისთვის იოლი მეტოქე არ იქნება და ლონდონელებს ნებისმიერ მეტოქესთან ნახევარფინალში გასვლის "რეალური" შანსი ექნებათ.

4."მილანი"

"როსონერი" იტალიის ჩემპიონატში ლიდერობს და მილანურ გუნდს სკუდეტოს მოპოვების რეალური შანსი აქვს. რაც შეეხება ჩემპიონთა ლიგას, "მილანმა" არაერთგვაროვანი შთაბეჭდილება დატოვა. "არსენალთან" პირველ მატჩში მასიმილიანო ალეგრის გუნდის ძლიერი მხარეები სრულად დავინახეთ, განმეორებითმა მატჩმა კი "მილანის" სუსტი მხარეები გვაჩვენა. "მილანის" თამაში დიდწილადაა დამოკიდებული ზლატან იბრაჰიმოვიჩზე და თუ შვედი მოწოდების სიმაღლეზე იქნება, "მილანს" ნებისმიერი მეტოქის დამარცხება შეუძლია.

3."ბაიერნი"

მიუნხენის "ბაიერნი" ბუნდესლიგის გათამაშებაში მთლად დამაჯერებელ თამაშს ვერ აჩვენებს და გათამაშების ცხრილში დორტმუნდის "ბორუსიასაც" ჩამორჩება. თუმცა, "ბაიერნის" მესვეურებმა არაერთხელ თქვეს, რომ მიმდინარე სეზონში გუნდის მთავარი პრიორიტეტი ჩემპიონთა ლიგაა. ბოლოს და ბოლოს, ფინალური მატჩი ხომ "ბაიერნის" სტადიონზე გაიმართება. მეოთხედფინალში "ბაიერნმა" ჩემპიონთა ლიგის რეკორდი დაამყარა - მეტოქეს შვიდი უპასუხო გოლი გაუტანა. შესაძლოა ვინმემ თქვას, "ბაზელის" კარში შვიდი გოლის გატანა არც ისე ძნელიაო, მაგრამ შვიდ გოლს გატანა სჭირდება. "ბაიერნის" ლიდერები ბრწყინვალე ფორმაში არიან და გუნდი მთლიანად კონცენტრირებულია ჩემპიონთა ლიგაზე. ასე რომ, თუ მიუნხენელები მეოთხედფინალსა და ნახევარფინალში ესპანურ გრანდებს აცდნენ, ფინალში გასვლის რეალური შანსიც აქვთ და ტურნირის მოგების ერთ-ერთი მთავარი ფავორიტებიც იქნებიან.

2."ბარსელონა"

ძნელია "ბარსელონა" მთავარ ფავორიტად არ დაასახელო, მაგრამ, შექმნილი ვითარებიდან გამომდინარე, ჩემპიონთა ლიგის მთავარი ფავორიტი კატალონიური კლუბი მაინც არ არის. ამ სეზონში "ბარსელონა" ფანტასტიკურ ფეხბურთს აჩვენებს, მაგრამ კატალონიელებს სტაბილურობა აკლიათ. რა არის ამის მიზეზი? ალბათ, მოტივაციის დაკარგვა. "ბარსას" ფეხბურთელებს უკვე ყველაფერი აქვთ მოგებული და ძნელია ყველა მატჩზე ერთნაირი მოტივაციით გასვლა. ალბათ, სწორედ ეს არის იმის მიზეზი, რომ ესპანეთის ჩემპიონატში "ბარსა" "რეალს" ათი ქულით ჩამორჩება. რა თქმა უნდა, ჩემპიონთა ლიგა და ესპანეთის ჩემპიონატი რადიკალურად განსხვავებული ტურნირებია, მაგრამ ესპანეთის ჩემპიონატში არასტაბილური თამაში რეიტინგის შედგენისას მაინც გასათვალისწინებელია. ჩემპიონთა ლიგა ზედიზედ ორჯერ არავის მოუგია. ეს ტრადიცია, შესაძლოა, წლეულს მაინც დაირღვას. "ბარსელონას" თავისუფლად შეუძლია ტურნირის მოგება.

1."რეალი"

უკანასკნელად "რეალმა" ჩემპიონთა ლიგა 2002 წელს ზიდანის ფანტასტიკური გოლის წყალობით მოიგო. ახლა მადრიდული კლუბი არაჩვეულებრივ ფორმაშია. "სამეფო კლუბის" ფეხბურთელები ტიტულებს მოწყურებული არიან. ესპანეთის ჩემპიონობა მოურინიოს გუნდს თითქმის განაღდებული აქვს. ახლა მთელი ყურადღება ჩემპიონთა ლიგაზეა გადატანილი. ერთადერთი გუნდი, რომელსაც მოურინიოს "რეალის" შეჩერება შეუძლია, "ბარესლონაა". რა თქმა უნდა, "რეალი"-"ბარსელონას" ფინალი იდეალური იქნებოდა. ერთმატჩიან დაპირისპირებაში "სამეფო კლუბს" კატალონიური გრანდის დამარცხების მეტი შანსი აქვს.

სტატიის მისამართი: http://24saati.ge/index.php/category/sport/football/2012-03-16/26620.html