ბალოტელი: "ეს იყო საოცარი საღამო"

მარიო ბალოტელიმ იტალია ევრო 2012-ის ფინალში გაიყვნა.

24 საათი 30.06.12

მარიო ბალოტელიმ დუბლი გაიფორმა

მარიო ბალოტელიმ იტალია ევრო 2012-ის ფინალში გაიყვნა.

იტალიური ფეხბურთის თავნება ვარსკვლავმა კარიერის უმნიშვნელოვანესი დუბლი შეასრულა. მატჩის შემდეგ ფეხბურთელმა თქვა, რომ გოლებს უძღვნის დედას, ჯანლუიჯი ბუფონმა კი აღიარა, რომ ფინალური სასტვენის შემდეგ გაბრაზებული იყო.

როდესაც ვარშავის ნაციონალური სტადიონის მიქს-ზონაში მარიო ბალოტელი გამოჩნდა, რეპორტიორებს მატჩის გმირისგან ინტერვიუს აღება სურდათ, მაგრამ სუპერმარიო მშვიდად მიდიოდა იტალიელთა ავტობუსისკენ და ჟურნალისტებს ყურადღებას არ აქცევდა. ვითარებას უშველა იტალიის ნაკრების პრეს-ოფიცერმა, რომელმაც ბალოტელი გააჩერა....

- ამ გამარჯვებას ვუძღვნი დედაჩემს, - თქვა იტალია-გერმანიის მატჩის გმირმა, - დღეს ის სტადიონზე იყო. მას შემდეგ, რაც შემცვალეს, ვუთხარი: "დედა, ეს გოლები შენ გეკუთვნის". ამ მომენტს დიდხანს ველოდი. დედაჩემი უკვე ხანდაზმულია, მაგრამ ვარშავაში ჩემს საგულშემატკივროდ მაინც ჩამოვიდა. ფინალს მამაც დაესწრება. ახლობლების მხარდაჭერა ძალას მმატებს.

- უკვე სამი გოლი გაქვთ გატანილი და ერთი თამაში დაგრჩათ გასამართი.

- ცხადია, შევეცდები, ევრო 2012-ის საუკეთესო ბომბარდირი გავხდე. ამისთვის ძალ-ღონეს არ დავიშურებ. რაც შეეხება დღევანდელ გოლებს, არ შემიძლია არ ვთქვა ჩემი პარტნიორების თამაშზე. კასანომ და მონტოლივომ არაჩვეულებრივი პასები მომცეს.

- რატომ შეგცვალეს?

- მეორე ტაიმში პატარა ტრავმა მივიღე. მიუხედავად ამისა, რამდენიმე წუთს მაინც ვითამაშე, რათა მწვრთნელს ამ ხნის განმავლობაში ცვლილება მოემზადებინა.

- იტალიის ჩემპიონატში დაბრუნებას არ აპირებთ?

- ჯერ არა. "სიტის" ფანებს ვუყვარვარ და მათ არ დავაღალატებ. დარწმუნებული ვარ, "სიტის" ქომაგებს ისევ ვეყვარები, მიუხედავად იმისა, რომ ინგლისის ნაკრები გამოვთიშეთ ევროპის პირველობას.

- ევროპის ჩემპიონობამდე ერთი ნაბიჯი დაგრჩათ. რას ფიქრობთ ესპანეთის ნაკრებთან გასამართ ფინალზე?

- შემიძლია შეგპირდეთ, რომ მინდორზე ბოლომდე დავიხარჯებით. ახლა მთავარია კარგად დავისვენოთ, ძალები აღვიდგინოთ, შემდეგ კი, უბრალოდ, გავიდეთ მინდორზე და ჩვენი ფეხბურთი ვითამაშოთ. დღეს საოცარი საღამო იყო, ყველაზე ფანტასტიკური ჩემს ცხოვრებაში. თუმცა, მჯერა, რომ კვირა საღამო უკეთესი იქნება.

ჟურნალისტებთან საუბარი იტალიის ნაკრების სხვა ფეხბურთელებმაც არ დაიზარეს. კლაუდიო მარკიზიო: "იტალიამ ფანტასტიკური მატჩი გამართა. ყველა ძალიან დავიღალეთ. ჩვენ დავამტკიცეთ, რომ ესპანეთის ნაკრებს არაფრით არ ჩამოვუვარდებით. მეტოქის წინაშე შიშზე საუბარიც არ უნდა იყოს. კვირას მინდორზე გავალთ და მოსაგებად ვითამაშებთ."

ჯანლუიჯი ბუფონი: "მატჩი რომ დამთავრდა, ძალიან გაბრაზებული ვიყავი. იმის ნაცვლად, რომ თამაში მშვიდად მიგვეყვანა გამარჯვებამდე, ცეცხლთან თამაში დავიწყეთ. ვფიქრობ, გერმანელებს ერთი შემთხვევითი გოლიც რომ გაეტანათ, დამატებით დროში 2:9-ს წავაგებდით. მე ყოველთვის თამაშს ვაფასებ და არა მხოლოდ შედეგს. მთლიანობაში ახალგაზრდა გუნდი გვყავს და ბევრი გვაქვს სასწავლი".

ანდრეა პირლო: "ჯერჯერობით არაფერი გაგვიკეთებია. ჯერჯერობით მხოლოდ ფინალის საგზური დავიბევეთ. ფინალის საგზური დამსახურებულად მოვიპოვეთ".

მარცხის შემდეგ გერმანელი ფეხბურთელები ლაპარაკის გუნებაზე არ იყვნენ, მაგრამ ჟურანლისტებთან ურთიერთობზე უარი არ თქვეს. ფილიპ ლამი: "თავად ვართ დამნაშავეები. რამდენჯერმე უხეშად შევცდით და მეტოქემ დაგვსაჯა. იტალიის ნაკრებმა ბრწყინვალედ ითამაშა. მეორე ტაიმში ყველაფერს ვაკეთებდით, რომ ანგარიში გაგვეთანაბრებინა. სამწუხაროდ, გოლი ძალიან გვიან გავიტანეთ".

იოახიმ ლიოვი: "ჩვენ გვყავს მარკო როისი, რომელიც ახალგაზრდაა, ჩვენ გვყავს მარიო გიოტცე, რომელიც ასევე ახალგაზრდაა, ჩვენ გვყავს მთავარი მწვრთნელი, რომელიც ასევე ახალგაზრდაა და თქვენ წინაშე დგას. უბრალოდ, ამ მატჩის შემდეგ დავბერდით".

სტატიის მისამართი: http://24saati.ge/index.php/category/sport/football/2012-06-30/30231.html