ევრობალასტი

16 წლამდელებში საქართველოს ნაკრებმა სომხეთს 106:50 მოუგო. +56 ყველა შემთხვევაში სასიამოვნოა.

ზურა თალაკვაძე

24 საათი 16.07.12

დუდა სანაძე (7) ალეხანდრო ბარეარაზე ავიდა.

სტატისტიკა სტატისტიკას ინახავს და კარგი იყო, +56 ჩვენთან დარჩება. 20 წლამდელებში საქართველოს ნაკრებმა ესპანეთთან 49:111 წააგო. -62 ყველა შემთხვევაში ცუდია.ესპანეთი ამ ასაკშიც ესპანეთია და საქმეს გემოვნებით აკეთებს. ესპანეთთან წაგება უხერხული არ არის. უბრალოდ, თუ თამაშისას უფრო მეტით აგებ, ვიდრე ქულას იღებ, ეს უკვე გაუგებარი, გაუმართლებელი ხდება. დავით უსტიაშვილი კარგი მწვრთნელია. მოქნილი აზროვნებით, სასიამოვნო მეთოდებით, სათქმელის გადმოცემის საკმარისი უნარით. უსტიაშვილი ბევრად კარგია, ვიდრე ის ნაკრები, რომელიც დათომ სლოვენიაში წაიყვანა. 50:88 ლატვიასთან, 67:103 თურქეთთან, -62 ესპანეთთან. საქართველოს ნაკრები პირველი ეტაპის ბალასტი იყო.

ესპანეთთან ვერ მოვხსენით მოსახსნელი. ოთხ მეოთხედში 22 (7 სხვის ტერიტორიაზე) მოხსნა ცოტა უხერხულია.

ესპანეთთან ვერ მოვაგვარეთ პრობლემები დაცვაში. ესპანელებმა 55 საშუალოდან 35 (63.6 %) ჩასვეს. ესპანეთი ჩვენთან ოფიციალური თამაშის დროს ვარჯიშობდა, სპარინგობდა.

ესპანეთმა სამიანები საშუალოდ (21/7) გაუშვა და აკურატულად მოხსნა თითქმის ყველაფერი, რაც ვერ ჩასვა. ფავორიტმა ჩვენი ტერიტორიიდან 18 მოხსნა წამოიღო. უხერხულია.

ესპანეთმა თამაში 17 პასით და 8 შეცდომით დახურა. რესპექტაბელური სტატისტიკაა.

საქართველომ თამაში 4 პასით და 20 შეცდომით დახურა. ნაკრები ამ სტატისტიკაზე უკეთესი უნდა იყოს. უსტიაშვილის ინტელექტი მეტს იმსახურებს. რაღაც არ აეწყო.

შარშან, ევროპის ჩემპიონატზე, უკეთეს გუნდებთან უკეთესად თამაში ვისწავლეთ. სწავლის სურვილი ნამდვილად იყო და მთელი ნაკრები ბოლომდე იღლებოდა. რუსეთთან მინუს ცოტას წაგება მისაღებია. იმ მომენტში ის წაგება მომდევნო, უფრო წარმატებული თამაშების წინ ექსკურსია გამოვიდა. კირილენკოსთან და ხრიაპასთან წაგებით ნაკრებმა კომპლიმენტები დაიმსახურა. ის რუსეთი იმ ჩემპიონატის მესამე ნაკრები გახდა. საქართველომ კარგად ითამაშა სლოვენიასთან და მხოლოდ მეორე ტაიმში, პერიმეტრის გახსნით წავაგეთ. ის საქართველო აგებდა და სწავლობდა. ეს საქართველო აგებდა და ამ წაგებაზე წერა ძნელია. რაზე უნდა წერო? მინუს სამოცდაორზე? უსიამოვნოა. ამ ჰანდიკაპის შემდეგ ბიჭებმა უნდა დაისვენონ და დასვენების დრო არ არის. დღეს ახალი ტური იწყება. მეორე, XIII-XVI ადგილებისთვის წვალებაში ესტონეთი, შვედეთი და მონტენეგრო დაგვისვეს. ამას მიზერული აზრი აღარ აქვს.

ესპანეთი ჩვენი ჯგუფიდან პირველი ადგილით გავიდა. მეორეზე თურქეთი დაჯდა. საინტერესო, მძიმე მატჩში თურქეთმა ლატვიას დამატებით დროში 64:61 მოუგო. თურქეთი კარგი იყო. ლატვიაც. ესპანეთი ამ ჯგუფის კოპერფილდია.

ინდივიდუალურად ყველამ ცუდზე უარესად გააკეთა საქმე. ჩამოვყაროთ.

ტეტელაშვილი - 9 წუთი, 1 ქულა, 2 შეცდომა, მოხსნის გარეშე, კარგი თამაშის კოეფიციენტი მინუს 21. -21.

ფხაკაძე - 17 წუთი, 3 ქულა, 2 შეცდომა, მოხსნის გარეშე. საინტერესოა. თან, ძალიან უინტერესო. კარგი თამაშის კოეფიციენტი - მინუს 28. ტურნირის სტატისტიკა - 2.7 ქულა, 2.7 პასი, 1.7 მოხსნა, 5.3 მოხსნა.

სანაძე - 30 წუთი, 10 ქულა, 5 მოხსნა, პასის გარეშე, 3 შეცდომა. სანაძე ნაკრების ლიდერია, დიდი ნაკრების კანდიდატებში ზის და პატარებში უფრო აკურატულად უნდა ისროლოს. ესპანეთთან დუდამ 6 სამიანი გაუშვა. ექვსივე სხვაგან წავიდა. კარგი თამაშის კოეფიციენტი - მინუს 42. კარგი მოთამაშისთვის ცუდია. 15.7 ქულა საინტერესოა. 5.0 მოხსნაც წავა. 21/5 სამიანი არადამაკმაყოფილებელია.

ბოქოლიშვილი - ამ ნაკრების კიდევ ერთი პოპულარული, ჩვენს დონეზე გაპიარებული ბიჭი და ესპანეთთან არაფერი არ წავიდა. 30 წუთი, 8 ქულა, 3 მოხსნა, 2 პასი, 3 შეცდომა. 4 ნასროლი, 4 ცუდი სამიანი და კარგი თამაშის ცუდი კოეფიციენტი - მინუს 48. საშუალოდ იღებს 9.0 ქულას, 1.7 პასს და 2.7 შეცდომას.

ჯავახიშვილი - 5 წუთი და არაფერი. ყველაფერში ნული. არ უსვრია, არ გაუფუჭებია, არავინ არ დაულეწავს და მშვიდად იყო. კარგი თამაშის კოეფიციენტი - მინუს 13.

მაჩალაძე - 11 წუთი, 1 დაფარება. მშვენიერი. დაფარება ესპანეთთან უნდა დაიმახსოვრო. ვისაც დაუფარე, ის შეიძლება მალე "მემფისში", მარკ გასოლთან ან "ბარსელონაში", სენიორ ნავაროსთან წავიდეს. ხდება ხოლმე. ლიმიტირებულ დროში 3 პერსონალურიც მიიღო. ბევრია. თავის მინუს თვრამეტთან ერთად.

თენიეშვილი - 25 წუთი, 4 ქულა, 0 მოხსნა, 0 პასი, 4 შეცდომა, 4 ფოლი. კარგი თამაშის კოეფიციენტი - მინუს 38.

ალხანაიძე - 23 წუთი, 6 ქულა, 6 მოხსნა, 1 პასი, 1 ჩაჭრა, 2 შეცდომა, 3 ფოლი. 4 ორიანიდან 2 გამოიყენა. კარგი თამაშის კოეფიციენტი - მინუს 28.

როგავა - დიდ ნაკრებში გამოიძახეს როგავა, არ გამოიძახეს გამყრელიძე. თაობები იცვლება და თაობებში ნიჭი უნდა შეიცვალოს. მარტო თაობის შეცვლა არ არის საკმარისი უკეთესი შედეგისთვის. როგავა, ალბათ, კარგი ბიჭია და ესპანეთთან დაკარგული იყო - 8 წუთი, უქულოდ, უპასოდ, 1 შეცდომით, ერთი არაზუსტი სამიანით. მინუს 12 სხვების ფონზე ჯეკპოტია. დიდებში სხვა კალათბურთი წავა.

ლომინაშვილი - 5 წუთში 2 ქულა და 1 შეცდომა. მინუს 5. ცოტა დროში ცოტა მოასწრო. 204 სანტიმეტრში მეტი აგრესია და ნაკლები რიდი უნდა იყოს. ნორმალური თამაში და ცუდი ჯამური სტატისტიკა. სამ თამაშში უფრო მეტი ფოლი (9) მიიღო, ვიდრე - ჯამური ქულა (4) და მოხსნა (2). ცუდია.

ბურჯანაძე - 35 წუთი, 15 ქულა, 5 მოხსნა, 1 შეცდომა, 1 ფოლი. კარგი სტატისტიკა წამოიღო. ამ ამბავში კარგი და ისე, მარგი ქმედების კოეფიციენტი ძალიან ცუდი იყო - მინუს 58. ბექამ 17 სროლიდან 5 გამოიყენა, 9 სამიანიდან 6 სხვაგან გაუშვა. ბურჯანაძე ნიჭიერია. ეს ნიჭი უკეთ უნდა გამოვიყენოთ და რაც არ იცის, ის უნდა ვასწავლოთ. ვინც უნდა ასწავლოს, იმან. ბურჯანაძე ტურნირზე - 12.7 ქულა, 6.3 მოხსნა.

ელიაძეს არ უთამაშია. დაისვენა და ვინც ითამაშა, ისიც დასვენებული იქნება.

დავით უსტიაშვილი ამ ნაკრებზე უკეთეს გუნდს იმსახურებს.

საქართველოს 20 წლამდელებმა პირველ სამ თამაშში 69 სამიანიდან 16 გამოიყენეს. 23.2 %. გამოსასწორებელია.

საქართველოს 20 წლამდელებმა პირველ სამ თამაშში საჯარიმოების 67.7 პროცენტი (62/42) გამოიყენეს. დიდი ბიჭების ცუდი სტატისტიკა.

საქართველოს 20 წლამდელებმა ცუდად ითამაშეს. 20 წლამდელებისთვის ცუდად.

ჯგუფური ეტაპის ბოლო თამაში ესპანეთთან 49:111 წავაგეთ. -62 ყველა შემთხვევაში ცუდია. ესპანეთი ამ ასაკშიც ესპანეთია და საქმეს გემოვნებით, არაჩვეულებრივად, ესპანურად აკეთებს. ესპანეთთან წაგება გეპატიება, არ გეჩხუბებიან და კუთხეში არ დაგაყენებენ. უბრალოდ, თუ თამაშისას უფრო მეტით აგებ, ვიდრე ქულას იღებ, ეს გაუგებარი, გაუმართლებელი ხდება. დავით უსტიაშვილი კარგი მწვრთნელია. მოქნილი აზროვნებით, სასიამოვნო მეთოდებით, სათქმელის გადმოცემის საკმარისი უნარით. უსტიაშვილი სულ სწავლობს. გორდონ ჰერბერტისგან, კენ შილდსისგან, იგორ კოკოშკოვისგან. უსტიაშვილი ბევრად კარგია, ვიდრე ის ნაკრები, რომელიც დათომ სლოვენიაში წაიყვანა. 50:88 ლატვიასთან, 67:103 თურქეთთან, -62 ესპანეთთან. საქართველოს ნაკრები პირველი ეტაპის ბალასტი იყო.

U 20. ევროპის ჩემპიონატი. სლოვენია

I ჯგუფური ეტაპი.

ესპანეთი - საქართველო 111:49 (29:13, 25:12, 32:19, 25:5)

ესპანეთი: სანსი (17), დიესი (17), ხ.ფერნანდესი (15).

საქართველო: ბურჯანაძე (15+5 მ), სანაძე (10), ბოქოლიშვილი (8), ალხანაიძე (6), თენიეშვილი (4), ფხაკაძე (3), ლომინაშვილი (2), ტეტელაშვილი (1).

სტატიის მისამართი: http://24saati.ge/index.php/category/sport/football/2012-07-16/30629.html