ბურთი - ოვალური ბურთი

ჯერ იყო ბურთი - ოვალური ბურთი. მერე იყო რაგბი, რომელმაც საქართველო გადარია და მსოფლიო ოვალურ სამყაროში საკუთარი ადგილი დაგვამკვიდრებინა.

24 საათი 30.03.10

ქართველმა მორაგბეებმა 50 წლის იუბილე "იაგუარებთან" გამარჯვებით აღნიშნეს

მანამდე კი, 1959 წელს, ქართულ სარაგბო სკოლას დიდუბეში, იპოდრომზე ჩაეყარა საფუძველი. მას მერე ნახევარი საუკუნე გავიდა. საკმაოდ დიდი დროა ისტორიისა და იმისთვის, რომ მასზე ფილმი შექმნა, ისეთი, რომლის პრემიერა გუშინ კინოსახლში გაიმართა. ფილმი, სახელად "ოვალური ბურთი", პირველი ნაბიჯებიდან დღემდე შეძლებისდაგვარად ასახავს ქართული რაგბის განვითარებას.

ფილმის რეჟისორის, გოგი თორაძის თქმით, ძნელი აღმოჩნდა ქართული სარაგბო სკოლის 50-წლიანი ისტორიის 30 წუთში ჩატევა. ასევე ძნელი იყო საარქივო მასალის მოძიება, რაც ასევე იგრძნობოდა სატელევიზიო ფორმატის ფილმის ყურებისას.

შავ-თეთრი და ისტორიული კადრები, ბოლოსკენ ფერადი და ქართული სარაგბო თემის წარმატებებით გაჯერებული… ფილმის შემქმნელებს პრეტენზია არა აქვთ, მათი ნამუშევარი რაგბის მატიანეთა შორის მოიხსენიონ.

ერთი სიტყვით, რაგბის მოყვარულებმა იხილეს ის, რითაც შეუძლია იამაყოს ქართულმა ოვალურმა სამყარომ.

"ცუდი იქნებოდა, რომ ასეთი ფილმი არ გადაღებულიყო. რაგბი ერთ-ერთი მხარეა ჩვენი ცხოვრების, რომლითაც შეგვიძლია ვიზეიმოთ და ვიამაყოთ. დღეს სწორედ ასეთი ფილმი ვიხილეთ", - ფილმის პრემიერის შემდეგ გვითხრა რეჟისორმა მერაბ კოკოჩაშვილმა.