ახალზელანდიური დებიუტი უკრაინასთან, ბორჯღალოსანთა თანხლებით

გიგა გურასაშვილი

24 საათი 28.01.12

მსოფლიო თასის შემდეგ პირველი მეტოქე უკრაინა იქნება
უკრაინასთან ზირაქიშვილის გარეშე მოგვიწევს თამაში

ახალზელანდიური დებიუტი უკრაინასთან, ბორჯღალოსანთა თანხლებით

ერთა თასი იწყება. იწყება საქართველო-უკრაინის დაპირისპირებით და, რაც ყველაზე საინტერესო და მნიშვნელოვანია, იწყება ახალზელანდიელ მწვრთნელთა ტანდემით - მთავარი მწვრთნელის, მილტონ ჰეიგის და მისი თანაშემწისა და შერკინების მწვრთნელის, კრის გიბსის სახით. უკრაინისთვის სამზადისს ბორჯღალოსნები 30 იანვრიდან "შევარდენის" ბაზაზე შეუდგებიან, 4 თებერვალს კი დნეპროპეტროვსკში, სტადიონ "მეტეორზე", ჰეიგისა და გიბსის სამწვრთნელო დებიუტი გაიმართება. მათ დახმარებას გაუწევენ ილია მაისურაძე, რომელიც ამავე სტატუსით სარგებლობდა ნაკრების შოტლანდიელ მწვრთნელ რიჩი დიქსონთან და ილია ზედგინიძე, რომელმაც ახალი ზელანდიის მსოფლიო თასის შემდეგ სათამაშო კარიერა დაასრულა და მწვრთნელობას შეუდგა.

საქართველოს მორაგბეთა ნაკრები "შევარდენის" ბაზაზე სამშაბათიდან პარასკევამდე ივარჯიშებს. ცნობილი გახდა ის 30-კაციანი სია, რომელიც ერთა თასის პირველი მატჩისთვის მოემზადება.

საქართველოსგან განსხვავებით, უკრაინელთა ქართველმა თავკაცმა ზაზა ლეჟავამ რამდენიმე დღით ადრე დაიჭირა თადარიგი - დაასახელა იმ 24 მორაგბის ვინაობა, ვინც, სავარაუდოდ, საქართველოს ნაკრებს დაუპირისპირდება. მათ შორისაა ერთი ქართველი - ცხრა ნომერი ზურაბ კიკაჩეიშვილი. მის გარდა, უკრაინელთა ღირსებას იცავენ ჯაბა მალაღურაძე და გიორგი გეგიძე. თუმცა, ლეჟავამ 4 თებერვლის მატჩისთვის მათ არ უხმო.

უკრაინის ნაკრებზე ფსონის ჩასვლა, ცოტა არ იყოს, სარისკოა - გათამაშების აუტსაიდერია. გასულ სეზონში მათ ხუთი თამაშიდან ხუთივე წააგეს, თანაც, პრემიალური ქულის აუღებლად. საქართველოს ეროვნული გუნდი უკრაინელებს ზუსტად ერთი წლის წინათ თბილისში, "ლოკომოტივის" სტადიონზე შეხვდა და დიდი ანგარიშით მოუგო - 62:3.

უკრაინელებმა, ერთა თასის გათამაშებაში ადგილი რომ შეინარჩუნონ, სულ მცირე, ორი მატჩი უნდა მოიგონ, თანაც, ორივე პრემიალური ქულებით (მატჩში ოთხი და მეტი ლელო უნდა გაიტანონ).

ერთა თასის გათამაშებაში ორი წლის ჯამში ბოლო ადგილზე გასული მომავალ წელს, როდესაც 2015 წლის მსოფლიო თასის შესარჩევი ტურნირი დაიწყება, ქვედა დივიზიონში გამარჯვებულს დაუთმობს ადგილს. იქ კი წარმატების ყველაზე დიდი შანსი მეტ-ნაკლებად მომძლავრებულ ბელგიას აქვს.

როგორც საქართველოს ნაკრების ახლად დანიშნული მწვრთნელი მილტონ ჰეიგი ამბობს, არც ერთი მეტოქის დაუფასებლობა არ შეიძლება.

საქართველოს ნაკრებში გამოძახებულთაგან ათი შიდა პირველობაში მოთამაშეა. როგორც მოსალოდნელი იყო, უმრავლესობა არმიელია - ისინი ექვსი კაცით არიან წარმოდგენილი. ორი ყოჩელია, თითო კი "ლელოსა" და "ლოკომოტივზე" მოდის. დანარჩენები, რა თქმა უნდა, საფრანგეთში მოთამაშე ლეგიონერები არიან. და კიდევ ერთი - პოლონეთში მოთამაშე ბექა წიკლაური.

საქართველოს ნაკრები:

ბურჯი: მიხეილ ნარიაშვილი (მონპელიე, საფრანგეთი), კარლენ ასიეშვილი (ორიაკი, საფრანგეთი), ლევან ჩილაჩავა (ტულონი, საფრანგეთი), ბექა შეყლაშვილი (აჟენი, საფრანგეთი); ჰუკერი: შალვა მამუკაშვილი (ყოჩები), ბექა მეკოკიშვილი (არმია); მეორე ხაზი: ლევან დათუნაშვილი (ორიაკი, საფრანგეთი), გიორგი ნემსაძე (ვალანს დ`აჟენი, საფრანგეთი), ვახტანგ მაისურაძე (ლა სენი, საფრანგეთი), მესამე ხაზი: გიორგი ჩხაიძე (სენ-ჟულიენი, საფრანგეთი), გიორგი კალმახელიძე (არმია), გივი ბერიშვილი (ლოკომოტივი), ვიქტორ კოლელიშვილი (ასმ კლერმონ-ოვერნი, საფრანგეთი), ბექა ბიწაძე (ბრივი, საფრანგეთი), მამუკა გორგოძე (მონპელიე, საფრანგეთი); 8 - დიმიტრი ბასილაია (ვალანს დ`აჟენი, საფრანგეთი); 9 - ირაკლი აბუსერიძე (ოსერი, საფრანგეთი), ბიძინა სამხარაძე (არმია), გიორგი ბეგაძე (ყოჩები); 10 - მერაბ კვირიკაშვილი (სენ-ჟულიენი, საფრანგეთი), ლაშა მალაღურაძე (ვალანს დ`აჟენი, საფრანგეთი); შუამარბი: დავით კაჭარავა (ნიცა, საფრანგეთი), გიორგი ჯიმშელაძე (ასმ კლერმონ-ოვერნი, საფრანგეთი), რევაზ გიგაური (ბულონი, საფრანგეთი); გარემარბი: ირაკლი მაჩხანელი (სენტ ეტიენი, საფრანგეთი), გიორგი შკინინი (არმია), ალექსანდრე თოდუა (ლელო), ალექსანდრე ტუჩაშვილი (არმია), ირაკლი ჩხიკვაძე (არმია); ფულბეკი: ბექა წიკლაური (არკად გდინია, პოლონეთი).

უკრაინის ნაკრები

უკანა ხაზი: სერგეი სუხიხი, მიკოლა კირსანოვი, ევგენი ჩაიკა, ვიაჩესლავ კრასილნიკი, რუსლან რადჩუკი, ოლექსანდრ ლომაკინი, დმიტრო ფედიშინი, ოლექსანდრ ცაპენკო, ზურაბ კიკაჩეიშვილი, სერგეი ცერკოვნი.

შერკინება: ოლეგ კოსარევი, დენის მასიუკოვი, სეგეი გარკავი, სერგეი მონასტირიოვი, ვიაჩესლავ პონომარენკო, ვიტალი კრამარენკო, ოლექსანდრ პოლიანსკი, ედუარდ ვერტილეცკი, დენის მილოვი, იური პიდგანიაკი, მაქსიმ კრავჩენკო, მიკოლა დელიერგიევი, ტარას მარჩენკო, არტემ ლულიკი.

სატურნირო მდგომარეობა

1. საქართველო 22 ქულა

2. რუმინეთი 16

3. პორტუგალია 14

4. რუსეთი 11

5. ესპანეთი 10

6. უკრაინა 0

ერთა თასი

4 თებერვალი

უკრაინა-საქართველო

11 თებერვალი

ესპანეთი-საქართველო