მსოფლიო თასი ქართველთა მასპინძლობითა და კარნახით დასრულდა

ძიუდოისტთა მსოფლიო თასს წარმომადგენლობითობა არასდროს აკლდა, მაგრამ 2012 წლის თასი ამ მხრივ აშკარად გამორჩეული გამოდგა.

გიგა გურასაშვილი

24 საათი 30.01.12

ლიპარტელიანმა ჩემპიონობით რეიტინგში 100 ქულა ჩაიწერა
ოქრუაშვილმა და ხანჯალიაშვილმა საქართველოს ჩემპიონატის ფინალი გაიმეორეს

49 ქვეყნის დელეგაციიდან 41 სპორტსმენებით იყო წარმოდგენილი - სულ 220 ძიუდოისტით.

შვიდი წონა და მედლების 28 კომპლექტი, რომლისგანაც სპორტის სასახლე ორ დღეში დაცარიელდა.

მედლების თითქმის სრული კომპლექტი, როგორც მოსალოდნელი იყო, საქართველოს ნაკრებს დარჩა, რომელიც, როგორც მასპინძელი, თითო წონაში ოთხ-ოთხი ძიუდოისტით გავიდა ტატამზე. შვიდიდან ექვსი წონითი კატეგორიის ფინალი ქართველთა გამარჯვებით დასრულდა. ის ერთადერთი ოქრო კი 100 კილოგრამში გერმანელმა დაისაკუთრა.

საქართველოს ნაკრების ასეთი უპირატესობის ერთ-ერთი მიზეზი ის იყო, რომ თბილისის მსოფლიო თასს წონითი კატეგორიების მოწინავე ათეულის არც ერთი წარმომადგენელი არ სტუმრობდა. ათეულში მყოფთ ლონდონის ოლიმპიური თამაშებისთვის საგზურები განაღდებული აქვთ და ახლა მათი მთავარი საზრუნავი ინდივიდუალური გრაფიკით მზადებაა. ჩამოსვლის შემთხვევაშიც ჩემპიონობით მოპოვებული შესაძლო 100 ქულა მათ ბევრს არაფერს შემატებდა.

მონაწილეთა შორის ყველაზე მაღალრეიტინგიანები იყვნენ ვარლამ ლიპარტელიანი (90 კგ.) და კანადელი ნიკ ტრიტონი (73 კგ.), რომლებიც თავიანთ წონებში მეცამეტე და მეთხუთმეტე საფეხურებზე არიან. აქედან ლიპარტელიანმა მსოფლიო რეიტინგში ყოფნა ჩემპიონობით განიმტკიცა, კანადელი კი პირველივე შეხვედრაში მომავალ ფინალისტ თენგიზ პაპოშვილთან დამარცხდა.

ტურნირის პირველ დღეს მედლები სამ წონით კატეგორიაში (60, 66, 73) გათამაშდა და სამივეში კვარცხლბეკის უმაღლეს საფეხურზე საქართველოს ნაკრების წარმომადგენლები ავიდნენ. ამასთან, სამიდან ორში ქართული ფინალი შედგა. სამი ოქროსა და ორი ვერცხლის გარდა, საჩემპიონო ყულაბაში ერთი ბრინჯაოს მედალიცაა.

პირველი დღისგან განსხვავებით, გაცილებით მნიშვნელოვანი გამოდგა ტურნირის მეორე დღე. წინა დღის მიმართ ინტერესს განსაზღვრავდა ათენის ოლიმპიური თამაშების ჩემპიონის ზურაბ ზვიადაურის (90 კგ.) ტატამზე დაბრუნება.

ხანგრძლივი პაუზის შემდეგ, საშეჯიბრო ასპარეზზე დაბრუნებულმა ტიტულოვანმა ქართველმა თბილისის მსოფლიოს თასი ბრინჯაოს მედლით და ტრავმით დაასრულა.

დამოუკიდებელი საქართველოს პირველი ოლიმპიური ჩემპიონი ფინალურ საგზურს მეოთხედფინალში, სერბ დიმიტრი გერასიმენკოსთან წაგების გამო გამოეთიშა, ბრინჯაოს გზაზე ჯერ უკრაინელ ქვეჯაუ ნაბალის სძლია, რეპეშაჟის ფინალში კი მოლდოველ ივან რემარენკოს იპონით გაუსწორდა. ოღონდ წმინდად მოგებული შეხვედრა ისედაც დაშავებული მხრის გაღიზიანებად და აუტანელ ტკივილად დაუჯდა - ზვიადაური ტატამიდან ექიმების გასაყვანი გახდა. როგორც გაირკვა, მაშინვე კლინიკაში წაუყვანიათ გამოსაკვლევად. თასის დასკვნით დღეს მოპოვებული სამი ოქროს, ამდენივე ვერცხლისა და ბრინჯაოს მედლიდან გამოსარჩევია 81 კგ წონითი კატეგორია, წონა, რომელშიც თავის ასაკში ყველაფრის მომგები ბექა ღვინიაშვილი ასპარეზობდა. ჭაბუკებში ევროპის და მსოფლიო ჩემპიონატების გამარჯვებული, ევროპის ახალგაზრდული ოლიმპიური ფესტივალის ჩემპიონი ტატამზე მასზე გამოცდილ და ძლიერ მეტოქეებს არ შეეპუა და ფინალამდე გაიკვალა გზა. ფინალში კი ავთანდილ ჭრიკიშვილთან დამარცხდა.

100 კგ ის ერთადერთი წონაა, რომელშიც ჩემპიონი ქართველი ვერ გახდა. სოსო მსხალაძეს ტიტულამდე გადამწყვეტი გამარჯვება დააკლდა. ფინალში მას გერმანელმა დიმიტრი პეტერსმა სძლია. მძიმე წონაში კი საქართველოს ჩემპიონატის ფინალი განმეორდა, თანაც, მსგავსი დასასრულით - ადამ ოქრუაშვილმა ზვიად ხანჯალიაშვილი დაამარცხა.

მსოფლიო თასი, თბილისი

60 კგ.

1. ბეთქილ შუკვანი (საქართველო)

2. არტემ არშანსკი (ისრაელი)

3. ლუდოვიკ ჩამარტინი (შვეიცარია)

3. ასხატ ტელმანოვი (ყაზახეთი)

66 კგ.

1. ლაშა შავდათუაშვილი (საქართველო)

2. სანდრო იაკობაშვილი (საქართველო)

3. იასპერ დე იონგი (ჰოლანდია)

3. გოლან პოლაკი (ისრაელი)

73 კგ.