უმსუბუქესი ბრინჯაო პარიზიდან

თბილისის მსოფლიო თასის შემდეგ ესტაფეტა ჩაიბარა პარიზის დიდმა სლემმა, რომელიც ლონდონის ოლიმპიური თამაშებისთვის სარეიტინგო ქულების დარიცხვით გაცილებით შთამბეჭდავია.

24 საათი 06.02.12

ჭრიკიშილი პარიზულ ტატამს საწყის წრეში გამოეთიშა
პაპინაშვილმა, ბრინჯაოსთან ერთად, 120 სარეიტინგო ქულაც გამოიმუშავა

თუ თბილისის ტატამზე ჩემპიონობისთვის 100 ქულა იყო გათვალისწინებული, პარიზში ჩემპიონობა 300 ქულად ფასობს. საქართველოს ნაკრების ყველაზე მაღალრეიტინგიანმა ძიუდოისტმა ამირან პაპინაშვილმა იმაზე მეტი ქულა დაიმსახურა, ვიდრე ამას შინაურ კედლებში შეძლებდა. თუმცა, ნაკრების დანარჩენმა წევრებმა მას ფეხი ვერ აუწყვეს და პირველივე წრეებში გამოეთიშნენ ასპარეზობას.

პარიზის დიდი სლემი ვარსკვლავების ნაკლებობას არასდროს უჩიოდა, ისევე როგორც წარმომადგენლობითობას, რაც 85 ქვეყნის 395 ვაჟ ძიუდოისტში აისახა (იყვნენ ქალთა ნაკრებებიც).

საქართველოს ნაკრები დიდი სლემის ტატამს რვაკაციანი შემადგენლობით ეწვია. ნაკრების მთავარმა მწვრთნელმა პეტერ ზაიზენბახერმა ყველა წონა დააკომპლექტა. გამონაკლისი მხოლოდ 73 კგ წონაა - აქ მწვრთნელმა გუნდის შევსებისგან თავი შეიკავა. 90 კგ-სა და მძიმე წონაში კი ორ-ორ ძიუდოისტს უხმო.

ტურნირის პირველი დღე სამ წონით კატეგორიას (60, 66, 73) დაეთმო. საქართველოს ნაკრებისთვის ყველაზე წარმატებული უმსუბუქესი წონა გამოდგა - ჩვენი გუნდის ყველაზე მაღალრეიტინგიანმა წევრმა ამირან პაპინაშვილმა პირად რეიტინგს 120 ქულა შემატა - ოთხი შეხვედრიდან სამში გაიმარჯვა და ბრინჯაოს მედალი მოიპოვა. დასანანია, რომ ფინალში გამსვლელ ბრძოლაში ქართველი მსოფლიოს რეიტინგში მასზე 22 საფეხურით დაბლა მდგომ სამხრეთკორეელ (28-ე ადგილი) ვონ ჯინ კიმთან იპონზე წამოეგო.

იმის გამო, რომ დიდ სლემზე რეპეშაჟის წესი არ მოქმედებს, ამირან პაპინაშვილი ნახევარფინალში გასვლისთვის ავტომატურად დაეუფლა მესამე ადგილს და თავის რეიტინგს 120 ქულა შემატა.

კორეელმა ნახევარფინალამდე დიდ სლემს გამოთიშა უკრაინის სახელით მოასპარეზე, ტომით ქართველი გიორგი ზანთარაია. ამავე წონაში რუსეთის სახელით ასპარეზობდა რობერტ მშვიდობაძე, რომელმაც ჩასათვლელი მეხუთე ადგილით დაასრულა ასპარეზობა.

ტურნირის პირველ დღეს ტატამზე გავიდა შალვა ქარდავაც (66 კგ.), მაგრამ წარმატებას ვერ მიაღწია. მეთექვსმეტედფინალში მან იტალიელ ფრანჩესკო ფარალდოსთან წმინდად წააგო და მხოლოდ 24 სარეიტინგო ქულას დასჯერდა. ამ შეხვედრამდე მან უკრაინის სახელით მოჭიდავე სომეხს, გევორქ გევორქიანს სუფთად მოუგო.

გუშინ, დასკვნით დღეს, ჩემპიონები და პრიზიორები გამოვლინდნენ 81, 90, 100 კგ და მძიმე წონით კატეგორიებში. ჩვენი ნაკრებიდან ტატამზე გავიდნენ ავთანდილ ჭრიკიშვილი (81 კგ.), ზურაბ ზვიადაური, ვარლამ ლიპარტელიანი (ორივე 90 კგ.), ლევან ჟორჟოლიანი (100 კგ.), ზვიად ხანჯალიაშვილი და ადამ ოქრუაშვილი (+100 კგ.). ვერც ერთმა ვერ მიაღწია ნახევარფინალამდე, რაც ბრინჯაოს მედლისა და სარეიტინგო 120 ქულის მომტანი იქნებოდა.

ზვიადაური და ჟორჟოლიანი პირველივე შეხვედრაში დამარცხდნენ, ჭრიკიშვილმა, ხანჯალიაშვილმა და ოქრუაშვილმა კი თითო მეტოქე დაამარცხეს. ორი მოგებით ყველაზე შორს წავიდა ლიპარტელიანი, მაგრამ ნახევარფინალამდე ერთი ნაბიჯი დააკლდა - მეოთხედფინალში წაგებით ჩასათვლელი მეხუთე ადგილი და 60 სარეიტინგო ქულა მოიპოვა.

საქართველოს ნაკრებს ლონდონის ოლიმპიური თამაშებისთვის საჭირო ქულებისთვის კიდევ მოუწევს ასპარეზობა. ჯერ ობერვარტის მსოფლიო თასზე (11-12 თებერვალი), შემდეგ - დიუსელდორფის დიდ პრიზზე (18-19 თებერვალი), პრაღის მსოფლიო თასზე (25-26 თებერვალი) და ჩელიაბინსკის ევროპის ჩემპიონატზე (26-28 აპრილი).

დიდი სლემის ჩემპიონებსა და პრიზიორებს 300, 180 და 120 სარეიტინგო ქულა ერგებათ, დიდი პრიზის მედალოსნებს - 200, 120 და 80. მსოფლიოს თასზე ჩემპიონობა 100 ქულად ფასობს, ვერცხლი - 60 ქულად, ხოლო ბრინჯაოსთვის 40 ქულაა გათვალისწინებული. ევროპის ჩემპიონატზე კი ოქრო, ვერცხლი და ბრინჯაო, შესაბამისად, 180, 108 და 72 ქულად ფასობს.

უმ­სუ­ბუ­ქე­სი ბრინ­ჯაო პა­რი­ზი­დან

უმსუბუქესი ბრინჯაო პარიზიდან